原先以為這個暑假最開心的是一家人到台灣旅行，豈料更精彩的活動，竟然在尾聲的日子出現。
當兩位囝囝知道之後，早在出發前的三四天，已經開心到訓唔到，因為整個活動都可以同心儀既卡通人物吃喝玩樂，就連訓覺都有相關物品相伴，夠吸引了吧？
經安排後，一家人及另一位網友由信德中心坐飛航船到澳門，兩兄弟途中已不停諗住同邊個人物影相，返香港又同邊個同學講，「興奮」兩個字講晒！
幾幸運，出閘同等車都非常順暢，真係一個好兆頭。
係大堂等公關姐姐時，兩位囝囝竟然已經識得自己搵食，大堂一角有流動檔口，原先仲以為售賣紀念品，而事實上有pop-corn同糖果免費供應，兩隻小魔怪既引擎已經開動食唔停。
當公關姐姐出現，同時送上welcome gift時，兩隻野即時拆開，原來但凡買套票入住「獨家夢工場主題家庭套房套票」 ，每位小朋友都會獲贈一份，不單有毛毛公仔，又有相架、膠水樽及手搖扇，全部都是夢工場最受歡迎的人物。
其實主題房只得33間，各有不同人物，上到房間，兩位囝囝如果唔係喝住，早已經飛撲上床，因為係可愛趣緻既「荒失失奇兵」房；小朋友房是一張上下格的木床，為避免小朋友手多及太熱，沿牆的石英燈泡早已拆下，看得出很細心；整個房間的檯椅全部都切合小朋友的高度，就連座地燈都包上海綿；仲有，作為小朋友房，早已預備一部遊戲機比小朋友，結果當我一影完相，兩隻小魔怪即刻跳上床，一人攬住一個咕，爬係張床打機，我終於可以睇下主人房。
事實上兩間房係打通，主人房不單預備了水果籃，更有曲奇餅及糖果歡迎住客，再望望小朋友洗手間，當然有一份只小朋友用的梳洗用品，毛巾亦設計成卡通樣，另外更有小孩專用的浴袍，又真係幾得意。
睇完一輪，係時候食lunch，公關姐姐安排了大家到酒店內三間餐中的「鮮」(相關食評 : 樂而忘返~~~「鮮」(澳門喜來登酒店) ，以點心及七款不同火鍋湯底招呼大家，牛肉、五花腩及羊肉無間斷供應，湯底又有特色，點心更是比香港不少酒店出色，第一餐已經飽到上心口。
飯後公關姐姐帶大家參觀酒店內其他相關活動；特別係酒店大堂的噴水池旁邊，早已分成四個區域，每隔十五分鐘，卡通人物就會出現同大家影相；原來兩兄弟早已經私下「傾」好，要同「馴龍記」既無牙仔影相，睇見佢地真係好開心。
影完相去左泳池睇睇，因為同樣設計成露天電影場，但因為天雨，所以改成室內，大家可要問清楚！而且更有「喜樂童聚」的活動，有兒童體操班、池畔遊戲、曲奇製作班、兒童拉丁舞班、臘筆填色班及池畔尋寶遊戲，挺適合不同年齡的小朋友。
望望手錶，又係時候睇「夢工場動畫明星巡遊」 ，眾多人物在商場大街內載歌載舞，又不時同觀眾互動，真係令人好開心，但只係得十五分鐘左右，實在太短時間啦！
兩位囝囝又食又玩，已經開始攰，捉佢地黎個午睡，自己反而走去會所來個下午茶，靜靜地喝一杯橙汁，吃件三文治，很舒服及寫意，實在太耐沒這種感覺了。
晚上給安排了再次光臨「Bene」(相關食評 : 再度重遇妳~~~~Bene (澳門喜來登酒店) ，上次米芝蓮大廚獻技已經令人欣賞，今次亦未有令人失望，菜色同樣吸引。
好充實既一日，話咁快就過，好期待第二日既節目呀！
地址 : 澳門喜來登酒店
如果喜歡這篇文章,請在我的專頁上剔"LIKE",當是給我小小的鼓勵吧!謝謝!
http://www.facebook.com/#!/foodiephilip
沒有留言:
發佈留言