食友CHRIS自學品酒,卓然有成,已經成為城中有數的人物,更抽空替大家惡補一下咖啡跟紅酒知識,說說笑笑,已經到了晚飯時間,就由食友帶路,找一間特色食肆試試.
可能都九時半,店內客人不多,只得小貓三四隻,所以上菜速度好快,咸菜勁辣胡椒豬肚湯($55)份量不多,但味道濃郁,配料差不多佔了半碗,胡椒的鮮辣味勁度十足,將肉羶肉都蓋過了,豬肚炆得太耐,口感有少許腍.而咸菜的酸味都滲入湯內,咸菜彷彿失去了靈魂,只留下軀殼.
不似粉嶺新漢記,客家黃酒煮雞($68)用上放湯的手法處理,雞肉煮得好熟,黃酒經揮發後,甜味都跑進湯中,未有逼入雞肉之內,無疑是有點失望.
而客家炸大腸($65)炸得好乾身,近乎柴皮一樣,油脂位去得清,令油甘失去,這是怕痕又怕痛的煮法,要吃,還是連膏一起炸來得芳香惹味.
金牌梅菜扣肉($68)是一味幾難失手的菜色,扣肉選用的五花腩,肌理分明,冰糖味不突出,肉質軟綿香糯,入口脂肪位油香四溢,令大家即時要加碗白飯,梅菜吸收肉汁及醬汁後,更加是白飯的良友.
加入蝦乾跟紅椒絲的鐡板o者o者芥蘭($55),咋咋聲上檯,熱氣冒升,香味四散,色香味俱全,只是嫌部份芥蘭比較老身,竟然會起渣,可惜.
作為小炒類,九菜花沙葛魚滑($58)算是合格,因為材料尚未夠乾身,油份多不成問題,反而水份多就差一點點,加入甘筍絲,令口多完化,如果可以再灑幾條紅椒絲增添辣味,更加是啤酒良友.
是日反而對香煎蓮藕蝦餅($65)反應最差,蝦餅肉質鬆散,雖然煎得微黃,可說是有水準,但食味始終無鑊氣,不慍不火,蝦味毫不特出,香味欠奉,可以OUT.
自從在大班樓品嚐過日本金蠔後,的確起了好感,見香煎流浮山金蠔($98)六隻,是便宜一大截,倒想看看是什麼貨色,說真的,食味比較硬身,再乾身恐怕便會變成蠔士了,但同樣蠔味凝聚,邊位煎得香口,明顯是煎不是炸的,值得收貨.
沙頭角魚鰾($108)同一樣的菜名,在新漢記食了不知多少次,亦是用勝瓜搭配肉碎做湯底,但味道似乎偏淡,魚鰾薄身,咬落湯汁吸得不多,有點畏手畏腳,未夠豪邁.
客家煎釀豆腐($60)是平常不過的小菜,幾件豆腐要收過半百,沒刀功,沒花巧,只簡簡單單的釀上豬肉去煎,想來至少有一半錢是落入業主手中,日子是一日難捱過一日,再過多幾年,要過百元一碟豆腐,大有可能.
鹽水鴨是後加小菜,價錢忘記了,但鴨味依然失色,一般而已.
埋單一人百二,十幾年前一夜夫妻價,說來真的便宜.
這個晚上都是杯上杯落,飲過不停,結果是未上車已半睡半醒…………..!
地址 : 元朗大馬路123號開心廣場9樓
電話 : 2479 1886
味道 : 3
環境 : 3
服務 : 3
衛生 : 3
抵食 : 4
地點 : 3
沒有留言:
發佈留言