Buffet是在下最愛用餐之一，主要原因當然係大食，從來不怕虧本，二來一個人去都不成問題，三來愛吃什麼自己挑，最後，就算有朋友一齊，總有找到啱心水既食物。
位處沙田石門的萬怡酒店，已經先後多次光顧，而食物水準及質素，可說是日見進步。
先在Seafood Station走一轉，鱈場蟹腳、翡翠螺、藍貝、凍海蝦、以及原隻麵包蟹，絕不欺場，每樣試少少，一般人已半飽，更何況如閣下有「食」力，大可將整隻爆膏麵包蟹消滅，夠回本了吧？
帆立貝海膽燒口感豐富，甜美的海膽汁配上烤焗過的帆立貝，既香且甜。
刺身點了海膽、北寄貝、甜蝦及八爪魚，都是在下喜歡的，解凍處理得不錯，沒有令人討厭的雪味或碎冰，夠水準；
最特別是每晚即場表演的切割原條三文魚，大家除了拍照，更可以食指定位置的魚生，難怪每晚都會沽清。
香醋醃製帶子配海膽可能白醋過於重手，不單太酸，而且把其他味道都蓋過了，要注意一下。
另外，更有吞拿魚海膽魚生飯、冷烏冬配海膽及三文魚籽好幾款海膽菜色，但之前的海鮮已佔了胃部不少空間，留前鬥後吧！
今次主題除了海膽外，更會送上煎焗頭抽原隻南非鮑魚，或者鹽燒原隻南非鮑魚一隻，而在下選了鹽燒鮑魚，用海鹽提升了鮮味，而肉質柔韌富彈性，真心覺得好味。
肉類方面有烤羊腿及特厚肉眼扒，羊腿似乎過熟，肉質有點偏硬，個人始終愛好肉質較生，而肉眼反而沒試。
在鐡板燒中要了煎牛脷，牛味濃郁，但忘了叮囑一下，結果煎得有點焦，其實效果可以更好。
每次食自肋餐都會喝湯，特別是有燉湯或老火湯的提供，蜜冬川貝雪梨燉花膠舀一下，發覺用料很足，湯水清澈而芳香，喝一口，材料的甜味都跑到湯內，前前後後喝了三四盅，太好了。
在下食自肋餐一向不依常理，見到想食就夾，沒有什麼先後次序，只不過在寫食評時略為安排。
頭盤中只吃了煙三文魚，煙燻味剛剛好，但都是即割三文魚較吸引。
芝士有Edam Cheese、Gruyere Cheese、Emmental Cheese及BrieCheese四款芝士，但不是愛好者，試了少少便算。
熱葷中最令在下欣賞是清蒸大青班，火喉啱啱好，肉質保持上佳狀態，幼嫩香滑，雖然是養班，但比起不少酒家蒸得還要好。
薑米海膽青蔥炒飯夠乾身，不過薑味似乎太強烈，加上蔥花的香氣，令人感覺不到海膽味，可惜。
其他如沙茶醬爆蝦仁、菜膽雞、烤焗栗子紅莓釀豬柳及芥末香草包糠焗春雞都是值得一試。
在焯料吧自行取了肥牛、海蝦及鮮魷，淥了碗冬蔭公湯底油麵，只有少許鹼水味，少少辣幾開胃。
另外，再用海膽汁煮了份海鮮，鮮魷、藍貝、沙蜆及海蝦，很rich的口感，海鮮添上甜味更可口。
以甜品壓軸好正常吖！
雪糕來了個大變身，由原先桶裝變成了哈根大師，仲要有草莓、咖啡、香草及朱古力四款口味，即時令身價都不同了，至少都衛生得多。
當然，即焗既香橙梳乎里，熱辣辣又香氣四溢，鬆化軟熟，正。
其他較有特色的有川貝龜靈膏及泰式甜品椰汁膏，比起第一次來是更多花款。
飲品不用愁只得一杯，因為咖啡奶茶都是任添，說起來吃上一個小時不停口都不是難事，加上附近想找好一點的食肆都不易，加上氣氛舒適，難怪差不多 一半以上客人是一家大細。
而這個海膽美饌自助晚餐星期一至四成人$428/小童$214，星期五至日及公眾假期成人$488/小童$244，如果有DBS/獅子銀行/恆生的信用卡，2至4位有9折，5至12位更可以享有85折優惠。
地址 : 沙田安平街1號香港沙田萬怡酒店
電話 : 3940 8888
如果喜歡這篇文章,請在我的專頁上剔"LIKE",當是給我小小的鼓勵吧!謝謝!
