走遠點,看多點

只要有看過我食評的朋友,大概都知道筆者喜歡在深圳四處鑽,打探一些特別的地方去逛逛,早在十年八年前,大家想買家具,大都會去梅園路或寶南北路一帶,但自從宜家進駐深圳後,大家又可以多個去處.

由於地點比較隔涉,之前去多數會選擇打的,但有地鐡後,店方提供接駁巴士來回白石洲站D出口直到總店地下停車場,只收象徵性一蚊,睇落好方便,但行車比較長時間,想趕時間,還是打的好.

相比起沙田店,深圳店有過之而無不及,從地下停車場上二樓,已經是宜家的範圍,一長列收銀櫃檯差不多是香港一倍以上,

同樣地有小食亭在收費處後,香港不記得是十蚊還是十二蚊一份熱狗加汽水,但深圳店出售的是同樣食品,不過只須五蚊,汽水還可以無限量添飲,夠豪氣.

從二樓步出平台,尚有其他幾間大型連鎖店,分別是香江家居,百安居,特力屋及順電等等.

再上一層有兒童遊戲室,當然地比香港的大得多,更有專人照顧小朋友,令家長可以放心購物.

穿過重重貨架及分類區後,可到了小食店,設計跟九龍灣店相近,坐位更多完化,適合不同家庭組合人士須要,亦有小朋友塌塌米圈,家長可以在外圍一邊進食,一邊照顧小朋友.

餐牌上最貴的香烤夾心三文魚亦不過二十三蚊,肉丸二十粒只要二十五點五蚊,筆者剛好踫上大運會優惠最後一天,一客十粒瑞典肉丸餐竟然是七個七,就連八蚊都不用,還有薯茸伴碟,平得令人發笑,試想想,在香港買粒魚蛋都不成.

簡簡單單的行了一遍,事實上貨品比香港平,但不設送貨,當是一個景點算了,反正走攰了還有地方竭竭.

回程車說是十五分鐘一班,只不過等了十分鐘就有車,未知準不準時,但車程耐倒是訓了幾覺.

如果在深圳走厭了東門,不妨走遠一點,看多一點.